Туган якның кара туфрагында,
Күкрәп үскән көчле имәндәй.
Туып-үстем җырлап, тамыр җәйдем,
Яшенләдем якты яшендәй.

Артта калган яшьлек елларымны,
Балык буаларын сагынам.
Ялан тәпи йөргән сукмакларым
Яшел үлән белән сарылган.

Сайрар кошлар миңа моңың биргән,
Салкын чишмә биргән көйләрен.
Җырлап яшим әле һаман да мин
Шигырь булып ага сүзләрем.

Ыңгырашып ауган каен сыман,
Әгәр сынсам көчле җилләрдә.
Җырым кала, шигырьләрем кала
Язмышымны минем сөйләргә.

ИРЕК ГАБДРАХМАНОВ